Daily
-
寫字
今日有人讚我啲字都幾靚，其實我唔知佢係咪真心，我曾經有覺得自己寫字靚過嘅，但當好耐冇揸支筆，再拎返起想寫一手好字，係好難架😭，所以我一啲都唔覺得而家自己寫嘅字靚😂😂….不過咁，俾佢讚一讚，我又有心想得閒就練好啲字🙈….我仲記得讀書嗰陣，我仲有去專登練左手寫字，原因係唔知邊度聽返嚟，左右手係用左右腦唔同去交叉控制，所以想開發右腦，係必須要學用左手寫字，呢樣野好似係有科學根據嘅，但係我有冇成功開發右腦呢，我又唔係咁清楚😂…不過其實寫字真係好緊要，好似我去見工嘅時候，要寫履歷填form，我都會盡力寫靚啲啲字，一手字好可能係俾人嘅第一印象，睇文字就可以知道你個人既性格，薯女啲字呢，係好整齊的，亦都好代表咗佢份人真係好整齊，而且都好憎人唔整齊😂… 另外，都啟發左我少少嘢，賣個關子先，因為我真係唔知薯女有冇偷睇我寫日記😅
-
農曆生日
我由細到大，都唔會留意自己嘅農曆生日，但係媽媽，就每年都會同我講生日快樂，但係我係冇睇農曆嘅習慣，點解佢會有嘅呢😂 不過好彩佢提一提我，又比我諗到啲嘢，就係喺結婚嗰日，姊妹會玩啲咩遊戲，會唔會問問題呢…唔問問題到底我有幾了解薯女，識答幾多題呢…就等我而家統計一下… 今次我終於知道咩叫下刪幾百字…因為我原本做統計嘅時候真係打咗幾百字，但諗諗吓我冇理由將佢嘅個人資料寫晒上網，所以最終我就下刪幾百字😂 同埋諗諗吓，有啲嘢要記，根本係唔使抄低既😎
-
終身美麗
我個體重，幾乎廿幾年都冇變過，周不時都有一d耐無見既朋友會同我講，做乜我又瘦左，其實我係會唔開心架…首先其實我個體重其實都無咩變體，不嬲都咁瘦㗎啦，點解一見面就要話瘦咗姐🥲 薯女成日想我肥，都試過好多唔同辦法，但都係唔多成功🤦🏼 但婚禮就嚟到，為左薯女唔需要減得太辛苦，我決定我試下增得辛苦過佢。 首先我再次戒煙，人哋話戒煙會肥，雖然我試過幾次都唔覺得有用🥲… 跟住就係食好多再加做運動，一日我飲三次蛋白奶，每晚比一個鐘做運動… 蘇哥….可唔可以俾我成功，20磅丫，我唔貪心🙏🏻
-
春嬌救志明
早十年多，春嬌系列既電影，貼地、寫實式既拍攝….抵死嘅對白，簡單既現代愛情故事。都算得上嗰個年代既經典… ”一世人流流長，總會遇上幾個人渣!” 都無咩80後既大家會唔識呢句對白。不過可惜既係，而家既香港，應該唔會有機會出現第四集，問題唔係無劇本，係主角同導演，唔知仲有幾多香港人願意比錢入去場支持。 唔好離題先，今日想提既其實係第二樣，樓上提到”人渣…”對白，人人都識，但大家記唔記得呢句” 無謂做咗啲咩嘢，又或者冇做啲咩野，而影響一段關係！” 無記錯應該係志明第三集講既… 而薯女今日就引用左呢句對白出post 歌頌我😆，當然佢係話我講呢句說話啦，唔知佢知唔知道我係引用電影嘅呢🙈… 一段關係，想要長久，一定要明白有啲咩可以做，有啲咩係唔可以做，關係係兩個人嘅事，從來都唔可以只顧一個人… 佢仲話每次我望住佢嘅眼神，佢都feel到愛，個心仲甜絲絲😍…其實佢唔知道嘅係，我成日都係佢瞓覺偷望佢，起身望佢會俾佢鬧🤣，但係呢段疫情期間，我都唔記得幾耐冇偷望過🥲
-
Final cut pro 10.6.1
早排，因為有一份相用左新相機影…而該相機既raw 我部老爺mac 既OS 唔support,我局住要upgrade 去OS MONTEREY… Upgrade 電腦係有十萬個不願意，但時代更替，又唔到你唔低頭🥲還記得朋友一句說話:電腦既野，用得越專業越唔應該亂upgrade, 就好似新OS未support color management, 就已經可以停工啦!” 我起初以為只係adobe 既軟件有影響，但今日想剪片，就發覺連個fcp 都用唔到🥲，咁無計啦唯有download 新既，但搞左好耐都用唔到，好彩最後高人指點，原來關舊plugin 累事，我一野delete 佢，就用到了😢… 做法如下: command+shift+g 輸入 /Library/Plug-Ins/ enter 用唔到既朋友， delete 舊plug-in 吧🙈，想辦法搵新既用啦😤
-
婚禮準備 (1)
薯女喺婚禮準備上，好似比較佛系，但時間一個月一個月咁過，我就發覺好原來已經好近，但我咩都未搞咁🙈，所以就唔識起心肝資料蒐集去準備。本來想搞得7788先同薯女講，但發覺係唔可行嘅，因為有太多野要同佢商量，我一個人係冇可能做決定嘅。 咁好啦，我就自己做咗個Excel ，就慢慢列晒有啲咩要做出嚟，我先發覺原來真係好多嘢要做㗎😨 最麻煩唔係喺準備喺大事情到，係有好多細節位要準備，例如要派帖喎，就唔係淨係印張帖，仲要數人頭有幾多男家定女家，要安排餅卡，搵資料之下先知道原來餅卡可以喺旋轉拍賣度平啲買到，以為買埋餅卡就收工，原來仲要買利是封，又要唱定啲紙幣… 呢份to do list ….暫時好似完成得一兩成，真係要加油😎 P.S: 薯女鍾意有條理既人，仲要係搞呢啲咁複雜嘅事情，絕對要安排得妥妥當當哦😌
-
ALEX SOLIS Pooh Pooh
呢隻由oddworx既Alex solis 設計的winnie the pooh, 熊如其名-Pooh Pooh. 呢隻公仔都出左好幾年，每款都限量的，我買到呢隻係最初代original winnie the pooh color 5in height 既size , 全球限量100隻。 呢隻色初期出既時候仲有隻8.5in height , 而家仲出多左兩隻色，分別係粉紅色同埋土豪金，而且仲多左隻jumbo size, 由於每款都hand made 而且限量，我見jumbo size 既ebay 有人炒到幾萬蚊隻。 我好彩既，竟然比我用一個非炒價既錢入手一隻5in 版，其實呢隻最襟買，size唔大，啱晒香港人一般都好骨子嘅屋企做擺設。 而且薯女恨左有呢隻公仔好耐，仲記得上年佢生日，我仲未買到隻公仔，就整左隻蛋糕版本過佢🙈 當時佢而經好開心🥳 到今日愚人節，我又冇理由愚人節送禮物嘅，我就同佢講係兒童節禮物😜 佢打開後保持佢嘅態度，佢個咀無笑，但個心喺到笑😌 佢仲同朋友讚我:都七年啦，佢仲肯花心思搞呢d嘢😎！ 我想講，我希望我地到七老八十，我仍然可以做到啲嘢，令你個心去笑🥸
-
最重要的小事
世界紛紛擾擾喧喧鬧鬧 什麼是真實為你跌跌撞撞傻傻笑笑 買一隻維尼就算庸庸碌碌匆匆忙忙 活過一輩子也要分分秒秒年年日日 全心守護你最小的事 上面係馬莎既歌詞，都係我好鐘意既一首五月天歌曲，愛情就係要記著伴侶每一件小事。 一輩子中，兩個人會一起經歷嘅大事未必有很多，但小事呢，係每時每刻都會遇到，所以若要生活好，唔係買利物浦，係小事要做好。 今日又為薯女做左件小事，我仲未話佢知，我覺得佢會開心的🤫。
-
Try to remember
“Try to remember, the kind of september” 反起跑線聯盟其中一幕校長唱起呢首歌，音樂一起，我第一時間諗起黎明同舒琪既玻璃之城… 我已經唔記得套戲其實好唔好睇，但每次聽到呢首歌，就會諗起套戲 音樂好犀利，好嘅配樂可以令人記住套電影，音樂係可以有回憶嘅能力… 所以有件事我諗左都幾耐，就係我結婚當日早拍晚播應該用咩音樂、用咩歌，我唔想係一首我平時比客會用嘅歌，我想搵一首係屬於我同薯女嘅，我想偶然我哋可能會喺其他地方聽到，都可以諗起自己嘅婚禮… 但….我仲係毫無頭緒😭
-
一首最浪漫的歌
今日杜生出左個post，問下大家邊首歌最浪漫，基於佢d post 多數都好多人亂答問題既關係，我都參與下答左首”合氣道”，但我估呢首歌無咩人識，其實首歌係杜生既，大家只係記得佢首眼睛想旅行…. 但隔左一段時間，有人留言搭嗲喎，竟然係薯女，佢答最浪漫嘅歌應該係”天下無雙”，我都係嗰句，我個嘴又笑，我個心仲笑得開心🥳 呢首係我既求婚歌….之一😂 係我既讀唱版，鴉…唔係..係獨唱版… 虎…唔係，薯女話係毒唱版😂🎼🎶 情人眼裏可以出西施😎但聽我唱歌佢都應該係選擇行開啲🙉