Movie
-
940920
劇中分別有兩個時空，A時空係二月廿九既原來時空，第一輯中，Yessa有穿越未來既能力，而喺結局家聰犧牲後，就出現B時空….咁A時空既yessa，佢既意識就跳左去B時空，但仲係帶有A時空既記憶。 神聖學會既大家，推斷出A B時空，喺94年9月20日前係相同的… 第二輯大家既穿越能力唔同咗，今次唔係去未來，係透過相片回到過去… 回帶返到去到94年9月20日，楚凝嘅犧牲，就分裂左B時空，一個家聰媽媽無自殺既時空，所以邏輯上，B時空出現，係唔關YESSA事嘅，並唔係上集嘅結尾分裂出來…只係家聰犧牲咗，令到yessa既意識去左第二個時空🤔… 而yessa 到左B時空，佢又入相回到過去，佢都叫做幫到手救人既，但佢最緊要既任務應該係比張飛楚凝，咁令到B時空既作家家聰，有機會再遇上楚凝…. 而A時空楚凝既消失，神聖幾何學會依然存在，但大家無左對佢既記憶，並繼續run 呢個學會，家聰就因為若有所失而離開去探索世界，繼而發展二月廿九既劇情… 結論係如果A時空yessa 無去到B時空，B時空既家聰就唔會太空館再遇上楚凝… 而楚凝如果無返去救人，就唔會從大家記憶消失，A時空既神聖幾何學會也會不一樣，唔會順利發展二月廿九既劇情… 所以A B時空雖然係平衡時空，但係其實係相輔相成，兩個時空互相影響… 但有個bug，到底B時空原本既yessa 去左邊，佢比A時空yessa 強佔身體，然後就無然後…. 而B時空喺94年9月21經已分裂出來，即係話A時空家聰既死係多餘既，因為B時空並唔係因為佢分裂出來…
-
940920
套劇都未播完，導演竟然對觀眾表示由於反應不似預期，表示自責，再解釋到劇本拍成咁既原因…. 我覺得佢咁做有點多餘，佢提到有原本的劇本，劇情完全不同，這個提來好像沒意義，因為都無拍到出來，跟本唔知結果係點，有好劇本拍亦都可以拍得差的… 而且作為一個創作人，無必要去判斷太多觀眾感受，太多判斷，就太商業化，太多既自我審查，這樣對創作毫無幫助。而且難得viutv呢個平台，看似比好大自由度創作人去發揮，老闆都未鬧，就不用太理會觀眾…就好似王家衛嘅戲，又有幾多個睇得明。 “追求卓越，成功自然找上你！”- 3idots 用心怕好自己想拍既野就夠啦！ Ps: 我集集追，未大結局唔比評語，穿越劇個結局點收尾好緊要，2月29都係個尾收得好先得到咁高評價！ PPS: 獨居青年唔應該睇太多愛情片，我越睇越掛住薯女😩
-
地產仔
馬王:”炒賣既叫做單位，有人情味既，嗰啲叫做家！” 又係viutv既劇集，睇呢套本來係為左睇浩南哥同fish，但睇睇下發覺每個角色都幾吸引，反而發覺浩南同fish 並唔係咁多戲份。 故事一貫viuTV作風，冇咩高潮位，冇特別嘅愛情線，仲差不多每集都玩一樣野-重複對白…但佢重複得來又唔令你煩厭，仲幾好笑🤭 主角狐飛係戇直到暈既人，現實生活根本唔可能搵到一個咁嘅人，但就係一個咁嘅人，佢會有咩唔怕直接講，佢又唔怕俾人笑，每句說話都係真心嘅！其實呢個世界需要多啲咁既人，現代人太多爾虞我詐，尤其係人大咗，想有個真心朋友係一d都唔易。 Stanley 喺劇到經常扮MJ mood walk,應該大家都一睇就知！但唔知大家又有無留意到有一幕係扮小丑樓梯跳舞，但呢幕我覺得可以拍得再靚d，要抄要致敬就應該抄得盡d😂 P.s: 薯女，我地一定要有一個屬於我倆，有人情味既家…
-
About time
由細到大都喜歡看關於時間旅行的電影或劇集，近期既有台灣既”想見你”，係可以透過一部walkman,聽住伍伯既last dance 去穿越…韓國既”西西弗斯的神話”，世界末日回到過去拯救未來…舊d既仲有”蝴蝶效應”、”十二猴子”….不過韓國既代表作應該係當年全智賢李政宰既”觸不到的戀人”，呢套比較特別，穿梭時空既係一個信箱…奇洛李維斯都翻拍一套”情流戀屋”…”回到最愛一天”,時間旅行係遺傳既技能…時間既電影，當然唔可以唔提路蘭既”天能”，逆轉時間、”星際啟示錄”，解釋時間既教科書式電影，仲談論到愛既力量係可以超越時間… 舊小小既time travel 既故事，都離唔開祖父悖論、時間悖論…但近年開始有所改變，記得係”變種特工-未來同盟戰”就提到，未來係可以改變，但係要用好大既力度先得，時間就像河流，掉粒石仔落去，會產生漣漪，但漣漪過後，水流依然係流去同一個方向，想改變流向，係需要掘出另一條路…. 香港既代表作品… 有江華既”九五至尊”，清朝皇帝來到現代，其實係一套幾出色既TVB劇集，搞笑得來有好多教育意義…仲有梁朝偉嘅”正牌韋小寶之奉旨溝女”，呢套其實就純粹搞笑😂…最經典嘅應該係周星馳嘅”西遊記-月光寶盒&仙履奇緣”，細個睇到笑，大個睇到喊… 呢幾套都比較舊，其實新d都有既，甄子丹有套”冰封俠”，第一集都好地地普普通通一套武打片，但唔知有幾多人有睇下集，完全冇budget地爛尾🤦🏼 呢排慣左睇viutv，”二月廿九”都多人講，但又無留意過到底係講乜…見佢就來出續集”940920”…就的起心肝睇啦…無諗過睇一套劇可以咁多感動位，而呢套講到要改變一樣野、就必須要犧牲另一樣野，等價交換… 最後提多一套，”回到十七歲”…呢套係個人身理上穿越，後生左幾十年，但個人仲喺現在…而故事就安排主角走多一次人生，做多一次選擇… 如果比機會我回到過去，我都會再次選擇薯女的…. “薯女,你呢?”🙈
-
倚天屠龍記
王晶真係無得頂，又一次將自己既經典拍爛⋯⋯其實作為一個電影人，藝術工作者，尊重下自己既專業可以嗎?真心想問咁多位演員知唔知自己拍緊咩?林峰擺明唔識功夫，你叫佢耍太極，同耍佢有咩分別…當年主角係李連杰呀大佬，你個故事仲要一模一樣，點唔比較呀…janice man 最尾0個句大都見，聽到都尷尬…我真係無膽睇埋下集… 其實一班上晒岸既大明星，真係可唔可以唔好拍爛片呢…
-
又多一個尊敬既藝人走啦 😔…智叔 廖啟智 這幾天，大家都都在post電影十年裡，智叔在本地蛋中既一句:千其唔可以慣！呢句說話，對呢個年代既我們，好大影響….但智叔拍過咁多套戲，我印像最深既，唔係十年，係殺破狼戲中佢叫陸冠華，係一個老差骨，同家人關係唔多好既人物背境..其中一幕，打返屋企搵媽媽，順手慰問下經已反面既爸爸 …但換來媽媽既答覆係:佢走左啦…好簡單既對話，都係好簡短既故事橋段，就帶出左珍惜眼前人既重要..而我印像點解咁深，係因為我當年都有類似既經驗😢但我唔係反面，只係無0係仲有得相處既時候，好好珍惜…
-
我們都是睇吳孟達長大的
香港80後呢一代人，都係睇周星馳既電影長大既。原因其實好簡單，我好肯定係同有線電影台有關。從前得tvb,要等到禮拜尾先有個星期日影院播下電影，直到有線出現，電影一二台每日廿四小時不停播，而且係瘋狂播星爺系列，有咩辦法唔套套都識背… 說到周星馳，大家都會記起吳孟達，他倆可算得上香港電影圈既天下無雙吧！試想想，影圈還有另一對會如此深入人心嗎？提到劉德華你會記起邊個？周潤發又可以配邊個？咁張家輝古天樂呢？我就最多都係諗到許冠杰有個最佳拍檔光頭佬麥嘉，但都只係限於最佳拍檔系列吧…賭聖星仔有三叔、至尊寶有二當家、大力金剛腿有黃金右腳，包龍星有包有為…. 如今，達叔先走了，星爺短暫現身靈堂，網民一貫鍵盤戰士作風，做咩都鬧🤦🏼♂️大陸仲吹風話功夫2既電影消息，又話星爺親身演出、又話紀念達叔而拍，一眾網友又鬧佢消費逝者又乜又物…我就唔多信既，因為其實功夫續集話拍都講左十年8年啦，D消息幾真都好，我都係比個”劉德華繼續吹.jpg”既反應…但其實真係拍既，又真係致敬達叔既，又有咩好鬧?大家會唔會鬧狂野時速仲提起Paul walker?認真，FF致敬paul既一幕，我係喊住走…如果星爺拍到套大家為達叔喊住走既戲，我覺係一年好事… 而我都相信，只有周星馳有足夠能力，拍得好吳孟達既故事…
-
Sweet Home
當一套劇集，拍到每一集可以當電影咁睇既時候，對於一般唔太喜歡煲劇，比較鍾意睇電影既我來講，絕對係一種享受。而sweet home呢套劇就做到呢一點啦。雖然係近十幾廿年都拍到爛既喪屍題材，就例如生化危機，都唔記得佢拍到第幾集啦，只記得近幾集都只不過係為睇而睇…又好似屍殺列車，第一集好地地既，續集變左做狂野時速喪屍版咁，我只記得睇左套飛車片，都諗唔起d喪屍係咩樣。 而S.H. 吸引到我既，係佢對喪屍既設定，每隻會係唔同既怪物，雖則樣衰，但天馬行空得來，又另人更印像深刻。記得早幾年有一套日本電影”i am a hero”,佢將喪屍加入左人性化設計，每隻喪屍唔咬人既時候，係會不斷重複做變喪屍前最喜愛既活動(鍾意shopping既女喪屍，就係不斷shopping…跳高選手喪屍，就係不斷跳高…),呢種人性化設定係有效另經已睇到厭既會有新鮮既感覺，其實S.H. 都係幫怪物加左人設(聽講原著漫畫交代得更清楚，有時間真係要搵來睇下），每隻怪物都係由慾望變成病毒繼而變身… S.H. 值得睇既既，除左喪屍設定，故事既人性反思，仲有係畫面設計，每一幕都光影如畫，呢d真係cctvb仲未見到既技術(雖然搵國際級劇集同佢比係大蝦細左d既), 近年都有見佢地想拍得畫面靚d既，但暫時睇到出來既效果，只不過似係買左支大光圈鏡去拍，都未見得學識運用光影🤦🏻♂️
-
嚦咕嚦咕新年財
每逢農曆新年，一家大細入戲院睇套賀歲片，都係香港人指定動作，但疫情既呢一年，戲院係仲未比開既，所以跟本就無戲上，咁我就唯有搵d舊戲來睇下，叫做過下戲癮。 開個Netflix search下，見到呢套嚦咕嚦咕新年財，當年都係入戲院睇既，到電視重播都睇過好幾次，第一次睇自己都仲細，到重播都係唔認真hea睇。但今次得閒乖乖坐低睇，發覺呢套戲一d都唔簡單，看似簡單既賀歲喜劇，原來充滿教育意義。 “牌品好，人品自然好!” 呢句對白相信無咩邊個香港人唔識。杜生亦係用呢句對白貫穿整套電影，主角德華由打牌順風順水，到詠琪咀咒完之後就無晒運，點打都係爛牌，但佢無放棄自己既格言，鋪牌點衰都好，牌品都要好。而牌品好既重要，唔只係打輸唔發脾氣，仲要係學識凡事都冷靜去面對(牌品差就未打完都反枱走左🙈),未到最後都未知結果。 呢part係我最喜歡既一幕，成手牌點打都輸，但原來呢個情況下，都仲係會有啱既做法。人生亦如是，我們要學懂疫境中找到快樂的方法，正面思想(牌品好),順境總會來的(老朋友，我知我打得好你就會返來)! 杜琪峰既電影，可以有好複雜既杜氏風格，亦可以係簡單既喜劇，但今次再睇嚦咕嚦咕，先發覺以為簡單既笑片，仲複雜過睇神探。人大了，看電影看到更多，解讀更多。 P.s:可惜德華到呢個年頭，已經唔係我地認識既民間特首🤦🏼