-
遇見
上星期，在鋪頭突然有位客人叫我的全名…原來是小學同學來的，咁多年無見再加上疫情下帶住口罩佢都認到我。 早兩日，走去其他區觀察下做個資料搜集，行行下又撞到個十幾年前既酒吧同事，佢一講我先知就剛剛我有留意既餐廳，原來裡頭有好幾位都係當年既舊同事。 就昨天，開緊bigday，襯空閒走出outdoor呼吸一下，竟然撞到我親弟弟，佢係來食buffet的，真係約都無咁橋😮 人生好奇妙，有些朋友，你無聊時可以打比佢9up幾句…有些朋友，你打比佢都覺得自己無聊…有些同學，想約都未必約到…有些同學，唔約都會撞到…有些人出現，有些人離開…你估唔到幾時出現，都估唔到幾時離開⋯⋯C’est la vie
-
Butterfly effect
蝴蝶效應 – 一隻蝴蝶在巴西輕拍翅膀，可以導致一個月後德克薩斯州的一場龍捲風。 早兩日，有位朋友來找我，佢本身正職係一位律師，亦都係一位業餘攝影愛好者。咁佢呢，就先收到一位朋友請求幫忙處理一張已故老人家既照片，照片需要退地用作身後事的…咁當日我餐廳就比較忙，朋友到左來找我既時候，見我咁忙就忍唔一住出手幫忙客串做個侍應,亦都好彩有作幫手，咁我同薯女先做得切…咁好啦，忙完啦，朋友仲幫忙清理現場，收好餐廳檔先處理佢既相片呢個時候我就感覺很有趣，佢有個朋友家人過左身，可以引申到佢要0係到part-time左一陣侍應，而佢明明係一個律師來的，我就想到，蝴蝶效應…就係呢個意思吧! 還有一本書 – 天堂遇見的5個人….也是在說這一種關係，人一生中會遇上不同的人、會做不同的事，有時做每件事，看似微不足道，但對呢個世界，原來係會產生意想不到的化學反應…
-
攝影的重點 在於看不到的地方
今日接到一個寵物拍攝job, 係影一隻狗仔既…呢個年頭，相機有寵物eye tracking，寵物拍攝基本上無咩難度…但呢單job，就有一個特別之處，就係主角狗仔原來生病了，醫生表示如下日子不多，本來個客約我幾星期後影既，但傾傾下，佢話都係約近d好，怕狗仔唔知等唔等到😢… 攝影的重點 在於看不到的地方，這說話是當年老師教的，每張相都會有佢背後既故事，而故事未必係可以靠畫面紀錄下來，看得懂的人自然會明白… 記得有一次，朋友傳來一張相想我幫忙修圖，圖片是她的一位一個女性客人的人像照，笑容甜美，唔難執既..而佢既要求就係”執靚d”，其實呢d都係佢平時比相我執既要求，但係0個次佢仲有下一句: 張相將會身後事用，她差不多了… 我修圖時，心很難受，難受在雖然我並不認識那位女生，但我想到一個人當面對自己最後的日子，係點樣有勇氣會去搵攝影師影輯相，而且係要笑住去影… 攝影師既工作，係去紀錄，有時可能很簡單，按個快門就可以了，但相片背後可能有著不簡單既故事…
-
又多一個尊敬既藝人走啦 😔…智叔 廖啟智 這幾天，大家都都在post電影十年裡，智叔在本地蛋中既一句:千其唔可以慣！呢句說話，對呢個年代既我們，好大影響….但智叔拍過咁多套戲，我印像最深既，唔係十年，係殺破狼戲中佢叫陸冠華，係一個老差骨，同家人關係唔多好既人物背境..其中一幕，打返屋企搵媽媽，順手慰問下經已反面既爸爸 …但換來媽媽既答覆係:佢走左啦…好簡單既對話，都係好簡短既故事橋段，就帶出左珍惜眼前人既重要..而我印像點解咁深，係因為我當年都有類似既經驗😢但我唔係反面，只係無0係仲有得相處既時候，好好珍惜…
-
我們都是睇吳孟達長大的
香港80後呢一代人，都係睇周星馳既電影長大既。原因其實好簡單，我好肯定係同有線電影台有關。從前得tvb,要等到禮拜尾先有個星期日影院播下電影，直到有線出現，電影一二台每日廿四小時不停播，而且係瘋狂播星爺系列，有咩辦法唔套套都識背… 說到周星馳，大家都會記起吳孟達，他倆可算得上香港電影圈既天下無雙吧！試想想，影圈還有另一對會如此深入人心嗎？提到劉德華你會記起邊個？周潤發又可以配邊個？咁張家輝古天樂呢？我就最多都係諗到許冠杰有個最佳拍檔光頭佬麥嘉，但都只係限於最佳拍檔系列吧…賭聖星仔有三叔、至尊寶有二當家、大力金剛腿有黃金右腳，包龍星有包有為…. 如今，達叔先走了，星爺短暫現身靈堂，網民一貫鍵盤戰士作風，做咩都鬧🤦🏼♂️大陸仲吹風話功夫2既電影消息，又話星爺親身演出、又話紀念達叔而拍，一眾網友又鬧佢消費逝者又乜又物…我就唔多信既，因為其實功夫續集話拍都講左十年8年啦，D消息幾真都好，我都係比個”劉德華繼續吹.jpg”既反應…但其實真係拍既，又真係致敬達叔既，又有咩好鬧?大家會唔會鬧狂野時速仲提起Paul walker?認真，FF致敬paul既一幕，我係喊住走…如果星爺拍到套大家為達叔喊住走既戲，我覺係一年好事… 而我都相信，只有周星馳有足夠能力，拍得好吳孟達既故事…
-
LEGO Ideas “Winnie the Pooh”
薯女愛pooh，LEGO預計會在2021年4月1日推出呢套”LEGO 21326 小熊維尼的家與朋友們”，官網見到呢個清息，我就知道，呢個金課定了幸好都唔算太貴，定價係US$ 99.99 。零件總數共 1265 件，官方size資料係（24 cm) high, 7 in. (18 cm) wide and 8 in. (22 cm) deep，都幾大件，要砌好應該唔難，難度高既係薯女又要執過個winnie the pooh收藏櫃去展示佢，相信呢個係比砌好佢更需時🙈
-
Sweet Home
當一套劇集，拍到每一集可以當電影咁睇既時候，對於一般唔太喜歡煲劇，比較鍾意睇電影既我來講，絕對係一種享受。而sweet home呢套劇就做到呢一點啦。雖然係近十幾廿年都拍到爛既喪屍題材，就例如生化危機，都唔記得佢拍到第幾集啦，只記得近幾集都只不過係為睇而睇…又好似屍殺列車，第一集好地地既，續集變左做狂野時速喪屍版咁，我只記得睇左套飛車片，都諗唔起d喪屍係咩樣。 而S.H. 吸引到我既，係佢對喪屍既設定，每隻會係唔同既怪物，雖則樣衰，但天馬行空得來，又另人更印像深刻。記得早幾年有一套日本電影”i am a hero”,佢將喪屍加入左人性化設計，每隻喪屍唔咬人既時候，係會不斷重複做變喪屍前最喜愛既活動(鍾意shopping既女喪屍，就係不斷shopping…跳高選手喪屍，就係不斷跳高…),呢種人性化設定係有效另經已睇到厭既會有新鮮既感覺，其實S.H. 都係幫怪物加左人設(聽講原著漫畫交代得更清楚，有時間真係要搵來睇下），每隻怪物都係由慾望變成病毒繼而變身… S.H. 值得睇既既，除左喪屍設定，故事既人性反思，仲有係畫面設計，每一幕都光影如畫，呢d真係cctvb仲未見到既技術(雖然搵國際級劇集同佢比係大蝦細左d既), 近年都有見佢地想拍得畫面靚d既，但暫時睇到出來既效果，只不過似係買左支大光圈鏡去拍，都未見得學識運用光影🤦🏻♂️
-
嚦咕嚦咕新年財
每逢農曆新年，一家大細入戲院睇套賀歲片，都係香港人指定動作，但疫情既呢一年，戲院係仲未比開既，所以跟本就無戲上，咁我就唯有搵d舊戲來睇下，叫做過下戲癮。 開個Netflix search下，見到呢套嚦咕嚦咕新年財，當年都係入戲院睇既，到電視重播都睇過好幾次，第一次睇自己都仲細，到重播都係唔認真hea睇。但今次得閒乖乖坐低睇，發覺呢套戲一d都唔簡單，看似簡單既賀歲喜劇，原來充滿教育意義。 “牌品好，人品自然好!” 呢句對白相信無咩邊個香港人唔識。杜生亦係用呢句對白貫穿整套電影，主角德華由打牌順風順水，到詠琪咀咒完之後就無晒運，點打都係爛牌，但佢無放棄自己既格言，鋪牌點衰都好，牌品都要好。而牌品好既重要，唔只係打輸唔發脾氣，仲要係學識凡事都冷靜去面對(牌品差就未打完都反枱走左🙈),未到最後都未知結果。 呢part係我最喜歡既一幕，成手牌點打都輸，但原來呢個情況下，都仲係會有啱既做法。人生亦如是，我們要學懂疫境中找到快樂的方法，正面思想(牌品好),順境總會來的(老朋友，我知我打得好你就會返來)! 杜琪峰既電影，可以有好複雜既杜氏風格，亦可以係簡單既喜劇，但今次再睇嚦咕嚦咕，先發覺以為簡單既笑片，仲複雜過睇神探。人大了，看電影看到更多，解讀更多。 P.s:可惜德華到呢個年頭，已經唔係我地認識既民間特首🤦🏼
-
富貴竹與轉運竹
今日薯太搵左個朋友到鋪頭睇風水，其實我地兩個都唔係過迷信既，但大家都覺得風水呢樣野，風水師叫到而自己又做到，都可以去試下既，一命二運三風水，我都覺總有d根據既!!咁風水師睇完晒，就叫我地擺一d風水設備，例如銅錢、流水陣、富貴竹等…. 到收鋪同隔離鋪吹下水，原來佢都幾信風水，仲話做生意唔到我地唔信咁話，咁大家就研究下風水師叫大家要做d咩，講到富貴竹0個part,笑點就來了^^ 話說佢從前家裡都有風水師叫佢擺富貴竹，咁佢就好乖去花墟訂左棵大大棵返屋企放，但0個年佢就覺得好似諸事不順咁，佢就搵返風水師來問，話自己都跟足晒點解仲係衰衰地咁，風水師就幫佢睇返先知佢原來係買錯左轉運竹，咁就奶晒野，擺好個陣要好運，點知轉走晒(笑到肚痛😂),所以佢就千叮萬囑我同無買錯，富貴竹係一枝枝直既，無買轉圈圈0個隻(繼續笑到肚痛🤣)
-
港府新招-封區
多區疫情爆發，香港政府出招日日新鮮，左禁右禁唔湊效， 禁晚市餐廳堂食、禁美容院、禁健身室等等⋯⋯ 其實禁唔係問題，問題係你禁左租户賺錢，跟住就推一堆所謂抗疫基金， 其實小商戶拎到既資助可能係租都未夠交，拎左去交租，就自己都無糧出⋯⋯ 然後政府呼籲業主減租，呢度真係要講粗口， 小商戶賺錢你就禁，點解你唔呼籲我地做小d生意齊心抗疫，而係禁止， 但業主就依然可以無視疫情繼續穩賺? 早兩日仲好笑，有兩位警察晚上7點左右行來我鋪頭， 警：你地係咪開緊鋪 我：係，有咩幫到你? 警：有人投訴你地營業中！ 我：唔係做做外賣都唔比呀? 警：咁你有無做堂食？ 我：咁你望唔望到有客? 之後可能佢都覺得自己問既問題有D白痴，佢就走左去⋯⋯ 應該一早封關你唔封，依家走去封區， 天才你仲有咩新招⋯⋯