Want some tear drops?

可惜薯女唔飲咖啡，亦都唔飲酒，我整既irish coffee，佢應該無咩興趣。

情意結之下買左隻愛爾蘭咖啡杯，放喺鋪頭display! 其實愛爾蘭咖啡係我第一杯認識既cocktail，認識嘅原因係當年一個網路作家-痞子蔡，佢寫咗個關於愛爾蘭咖啡嘅故事，當然呢杯飲品，原本就係一個愛情故事。

一個bartender，愛上一個剩係飲咖啡既空姐，佢就特製一杯空姐有可能order 既coffee cocktail 。

其實呢杯飲品要做唔難，只不過係細節位好多人都無理會，燒杯係為左加熱威士忌，加入砂糖去燒，除咗增加甜味，其實亦都係一個指標，見到砂糖溶嘅時候，就代表酒精就夠熱，千祈唔好點着酒精，係會揮發左啲酒精，但好多就算係傳統嘅餐廳，為咗表演俾客人睇，佢哋都係會點着啲酒🤦🏼…..

咖啡嘅選擇就唔多緊要，按個人喜好去做就得…

最後嗰層奶油就係重點，其實而家好興既奶蓋，就係愛爾蘭咖啡最上層既一層奶油，千祈唔好用噴射忌廉射上面，呢個做法絕對係話俾客人知你對呢杯飲品嘅無知🤦🏼…

要記住呢杯係一杯熱飲，但係格住奶油立即可以飲到落口，伴隨着威士忌加上熱咖啡，會有一個暖入心嘅感覺…

我就未去過愛爾蘭，但以前喺機場做，我有試過做呢杯飲品比一個愛爾蘭人，佢同我講，原來連愛爾蘭都好少人認真做呢杯咖啡，佢話我整嘅係佢飲過最好飲嘅杯，我唔知佢係做吓善事隨口讚賞下，定係真心，但點都好啦，任何事既細節係好緊要。細節位唔係俾人睇，係比自己睇嘅，但往往就可以令人哋感受到嗰件事嘅質素。